వైసీపీ ఫొటోల‌తో సహా దొరికిపోయిందిగా...     2018-05-08   00:58:44  IST  Bhanu C

ఏపీలో ఉన్న రాజ‌కీయ ప‌రిణామాలు చాలా విభిన్నంగా ఉన్నాయి. ఇక్క‌డ రాష్ట్రానికి ప్ర‌త్యేక హోదా కోసం పెద్ద ఎత్తున ఉద్య‌మాలు సాగుతున్నా యి. ముఖ్యంగా అధికారంలో ఉన్న టీడీపీ.. కేంద్రంలోని బీజేపీని శ‌త్రువుగా మార్చేసింది. ఏపీకి శ‌త్రువు ఎవ‌రైనా ఉన్నారంటే.. అది బీజేపీనేన‌ని, ప్ర‌ధాని న‌రేంద్ర మోడీనేన‌ని ప్ర‌చారం చేస్తోంది. ప్ర‌త్యేక హోదా విష‌యంలో త‌లెత్తిన ఈ వివాదం.. అటు తిరిగి.. ఇటు తిరిగి బీజేపీ మెడ‌కు చుట్టారు టీడీపీ అధినేత చంద్ర‌బాబు. ఆయ‌న ఆధ్వ‌ర్యంలోనే కేంద్రంపై విరుచుకుప‌డుతున్నారు. ఈ క్ర‌మంలోనే బీజేపీపై క‌త్తిక‌ట్టిన‌ట్టు వ్య‌వ‌హ‌రిస్తున్నారు.

ప్ర‌స్తుతం క‌ర్ణాట‌క‌లో ఎన్నిక‌లు జ‌ర‌గ‌నున్న నేప‌థ్యంలో అక్క‌డ బీజేపీకి వ్య‌తిరేకంగా కూడా టీడీపీ ప్ర‌చారం చేయిస్తోంది. దీనికిగాను పెద్ద ఎత్తున త‌న టీంను రంగంలోకి దింపింది. అయితే, అదే స‌మ‌యంలో బీజేపీని త‌న లాగా తిట్ట‌నివారు ఎవ‌రైనా ఏపీకి అన్యాయం చేసిన‌ట్టేన‌ని పెద్ద ఎత్తున ప్ర‌చారం చేస్తున్నాడు చంద్ర‌బాబు అండ్ త‌మ్మ‌ళ్ల టీం. ఈ క్ర‌మంలోనే వీరు వైసీపీ, ప‌వ‌న్‌ల‌ను దోషులుగా చిత్రీక‌రిస్తున్న విష‌యం తెలిసిందే. దీంతో రాష్ట్రంలో బీజేపీని తిట్ట‌కపోతే పాపం అన్న‌ట్టుగా మార్చేశారు చంద్ర‌బాబు. ఇక, సీన్ క‌ట్ చేస్తే.. విప‌క్షం వైసీపీ.. వ‌చ్చే ఏడాది జ‌ర‌గ‌నున్న ఎన్నిక‌ల్లో ఏపీలో అధికారంలోకి రావాల‌ని భావిస్తోంది.