లైట్ తీసుకుంటున్న పవన్ ... రగిలిపోతున్న ఫ్యాన్స్    2018-06-30   23:03:11  IST  Bhanu C

రాజకీయంగా దూకుడు పెంచిన పవన్ కళ్యాణ్ ఎన్నికలే లక్ష్యంగా ప్రజా పోరాట యాత్ర చేస్తూ.. తన ఆవేశపూరిత ప్రసంగాలతో ప్రజలను ఆకట్టుకుంటూ తనవైపు తిప్పుకునే ప్రయత్నం చేస్తున్నారు. ప్రజా సమస్యలపై అధికార పార్టీపై విమర్శల బాణాలు కూడా వదులుతున్నాడు. దీంతో పాటు జనసేనలోకి కూడా ఇప్పుడిప్పుడే ముఖ్యనేతల చేరికలు ప్రారంభమయ్యాయి. అయితే అదే సమయంలో జనసేనానికి కొత్త తలనొప్పులు కూడా మొదలయ్యాయి.

పవన్ యాత్రలో జనసేన కార్యకర్తలకు, వాలంటీర్లకు ఇస్తోన్న విలువ ఫ్యాన్స్‌కు ఇవ్వడం లేదని అభిమాన సంఘాలు గుర్రుగా ఉన్నారు. అభిమానులు పవన్‌‌ను కలవకుండా వాలంటీర్లు, కార్యకర్తలు అడ్డుకుంటున్నారని మండిపడుతున్నారు. ముఖ్యంగా పవన్‌ పోరాట యాత్రలో ఫ్యాన్స్‌ను కనీసం లెక్కలోకి తీసుకోవడం లేదని వాపోతున్నారు. దీంతో జనసేన కార్యకర్తలకు, పవన్‌ ఫ్యాన్స్‌కు మధ్య విభేదాలు తలెత్తుతున్నాయి. అభిమానులను పవన్‌ నిర్లక్ష్యం చేయడాన్ని ఫ్యాన్స్‌ జీర్ణించుకోలేకపోతున్నారు.