ఉత్త‌రాంధ్ర‌పై ప‌వ‌న్‌కు ఎందుకింత ఓవ‌ర్ ఫీల్‌!     2018-06-23   00:41:21  IST  Bhanu C

ప్ర‌శ్నిస్తానంటూ ప్ర‌జ‌ల్లోకి వ‌చ్చి, పార్టీ పెట్టిన జ‌న‌సేన అధినేత ప‌వ‌న్ క‌ళ్యాణ్‌.. ఇటీవ‌ల 45 రోజుల టార్గెట్‌తో పోరు యాత్ర ప్రారంభించారు. అది కూడా ఉత్త‌రాంధ్ర‌లో ఆయ‌న ఈ యాత్ర సాగించ‌డం గ‌మ‌నార్హం. అయితే, ఈ యాత్ర‌కు అనుకోని అవాంత‌రాలు ఏర్ప‌డుతుండ‌డంతో కుంటుతోంది. ఇదిలావుంటే, అక‌స్మాత్తుగా ఉత్త‌రాంధ్ర‌పై ప‌వ‌న్‌కు ఎందుకింత ప్రేమ పుట్టుకొచ్చింది? ఆయ‌న ఎందుకింత‌గా ఫీలైపోతున్నారు? అనే ప్ర‌శ్న‌లు ఉత్ప‌న్న‌మ‌వుతున్నాయి. నిజానికి రాష్ట్రంలో అనేక ప్రాంతాలు వెనుక‌బ‌డే ఉన్నాయి. వాటికి కేవలం ఆర్థిక కార‌ణాలే కార‌ణం కాదు.

ప‌లు భౌగోళిక కార‌ణాలు, రాజ‌కీయ కార‌ణాలు కూడా ఉన్నాయి. వీటి వ‌ల్లే.. ఆయా ప్రాంతాలు వెనుక‌బ‌డి ఉన్నాయి. అయితే, వీట‌న్నింటినీ వ‌దిలేసి.. ప‌వ‌న్ నేరుగా ఉత్త‌రాంధ్ర వైపే అడుగులు వేశారు. నిజానికి ఉత్తరాంధ్ర వెనుకబాటు తనం అనేది ఇవాళ పవన్ కల్యాణ్ కొత్తగా కనిపెట్టిన సంగతి ఎంతమాత్రమూ కాదు. ఆ ప్రాంతానికి ప్రభుత్వాలు అన్యాయం చేస్తున్నాయని ఆయన నినదిస్తున్నారు. సాధారణంగా రాజకీయ నాయకులు అంటే నే ఏ రోటికాడ ఆ పాట పాడే రకాలు గనుక.. ప్రస్తుతం ఉత్తరాంధ్ర పర్యటనలో ఉన్న పవన్ కల్యాణ్.. ఇలా ఉత్తరాంధ్ర వెనుకబాటు తనం గురించి, వారికి జరుగుతున్న అన్యాయం గురించి ఎలుగెత్తి చాటడంలో ఆశ్చర్యం ఏమీ లేదు.