ప‌వ‌న్‌తో ఆ పార్టీల పొత్తులా.... స‌వాల‌క్ష సందేహాలు    2018-06-27   01:38:33  IST 

ఏపీలో రాజ‌కీయ ప‌రిణామాలు ఆస‌క్తిని రేపుతున్నాయి.. ఎన్నిక‌లు స‌మీపిస్తున్న వేళ‌లో ప‌లు పార్టీలు పొత్తు దిశ‌గా అడుగులు వేస్తున్నాయి.. క‌లిసి ప‌నిచేసేందుకు, క‌లిసి బ‌రిలోకి దిగేందుకు స‌మాయ‌త్తం అవుతున్నాయి.. అయితే క‌లిసి న‌డ‌వాల‌ని చూస్తున్న పార్టీల నేత‌ల్లో అంద‌రూ అంద‌రే కావ‌డం గ‌మ‌నార్హం. ఏపీలో ప్రత్యామ్నాయ రాజ‌కీయ వేదికను ఏర్పాటు చేసేందుకు కృషి చేస్తామ‌ని సీపీఐ రాష్ట్ర కార్య‌ద‌ర్శి రామ‌కృష్ణ చేసిన ప్ర‌క‌ట‌న ఏపీలో ఆస‌క్తిక‌ర‌మైన చ‌ర్చ‌కు దారి తీస్తోంది.

ఏపీలో వామ‌పక్షాలు, జ‌న‌సేన‌, లోక్‌స‌త్తా, ఆమ్ ఆద్మీ పార్టీలు క‌లిసి ప‌నిచేస్తాయ‌ని, వ‌చ్చే ఎన్నిక‌ల్లోనూ క‌లిసి బ‌రిలోకి దిగుతాయ‌ని ఆయ‌న ప్ర‌క‌ట‌న‌లోని సారాంశం. అయితే ఆయా పార్టీల సిద్ధాంతాలు, నేత‌ల వ్య‌వ‌హార శైలితో ప్ర‌త్యామ్నాయ వేదిక ఏర్పాటు సాధ్య‌మేనా అనే అనుమానాలు వ్య‌క్త‌మ‌వుతున్నాయి. అయితే.. ఇందులో కాంగ్రెస్ పార్టీగానీ, వైసీపీగానీ లేక‌పోవ‌డం గ‌మ‌నార్హం. ప్ర‌తిప‌క్షాలుగానే ఉన్న ఈ రెండు పార్టీల‌ను ప్ర‌త్యామ్నాయ రాజ‌కీయ వేదిక‌లో ఎందుకు భాగ‌చేయ‌డం లేద‌న్న‌ది ఇప్పుడు అంద‌రిలో క‌లుగుతున్న ప్ర‌శ్న‌.