మల్టీస్టారర్‌లో ఎన్టీఆర్‌కు అన్యాయం జరుగుతుందా?

టాలీవుడ్‌ జక్కన్న రాజమౌళి దర్శకత్వంలో ఎన్టీఆర్‌, రామ్‌ చరణ్‌లు హీరోలుగా ఒక భారీ మల్టీస్టారర్‌ తెరకెక్కబోతున్న విషయం తెల్సిందే. ఆ చిత్రానికి సంబంధించిన స్క్రిప్ట్‌ వర్క్‌ ప్రస్తుతం శరవేగంగా జరుగుతుంది. రాజమౌళి ఏం చేసినా పక్కా పకడ్బందీగా చేస్తాడు అనే విషయం తెల్సిందే. భారీ ఎత్తున మల్టీస్టారర్‌ను తెరకెక్కించేందుకు జక్కన్న తన మార్క్‌ను వినియోగిస్తున్నాడు. బాహుబలి చిత్రం తర్వాత ఆయన దర్శకత్వంలో సినిమా అవ్వడంతో అంచనాలు ఆకాశాన్ని తాకేలా ఉన్నాయి. అంచనాలకు తగ్గట్లుగా సినిమాను ఆయన రూపొందిస్తాడని చిన్న పిల్లల నుండి పెద్ద వారి వరకు అంతా కూడా అంచనాలు పెట్టుకున్నారు.

ఇక ఈ మల్టీస్టారర్‌లో హీరోల పాత్రలపై తాజాగా క్లారిటీ వచ్చేసింది. మొదట ఎన్టీఆర్‌, రామ్‌ చరణ్‌లు ఇద్దరు కూడా ఈ చిత్రంలో ఫైటర్స్‌గా కనిపించబోతున్నట్లుగా వార్తలు వచ్చాయి. ఆ తర్వాత అన్నదమ్ముళ్లుగా వీరిద్దరు కనిపిస్తారని సమాచారం అందుతుంది. తాజాగా అందుతున్న సమాచారం ప్రకారం ఎన్టీఆర్‌ గ్యాంగ్‌స్టర్‌గా కనిపించనుండగా, రామ్‌ చరణ్‌ పోలీస్‌ ఆఫీసర్‌గా కనిపించబోతున్నట్లుగా తెలుస్తోంది. ఈ విషయాన్ని స్వయంగా చిత్ర యూనిట్‌ సభ్యులు అనధికారికంగా లీక్‌ చేయడం జరిగింది. సినిమాపై అంచనాలు పెంచేందుకు ఇలాంటివి అప్పుడప్పుడు అంతా చేస్తూ ఉంటారు. అందరిలా జక్కన్న కూడా పాత్రను లీక్‌ చేశాడు.