ఆఫీసర్‌ బాధ్యతలు నెత్తికెత్తుకున్న నాగ్‌    2018-05-23   06:48:17  IST  Raghu V

ఒక సినిమాలో నటించిన హీరో ఆ సినిమాకు సంబంధించిన ప్రోమోషన్‌ విషయాల్లో తప్ప బిజినెస్‌ వ్యవహారాల్లో, విడుదలకు సంబంధించిన విషయాల్లో తలదూర్చరు. స్టార్‌ హీరోలు కూడా తమ పని ఏదో తాము చేసుకున్నాం అన్నట్లుగా వ్యవహరిస్తారు. సినిమా విడుదలకు ఎలాంటి అడ్డంకులు ఎదురైనా కూడా హీరోలు బాధ్యతను స్వీకరించరు. కాని తాజాగా వర్మ దర్శకత్వంలో తెరకెక్కిన ‘ఆఫీసర్‌’ చిత్రం కోసం నాగార్జున ప్రత్యేక శ్రద్ద తీసుకున్నాడు. సినిమా విడుదలకు చిక్కు నెలకొన్న నేపథ్యంలో ఆయన ముందుండి ఆ సమస్యల నుండి బయట పడేసేందుకు తన వంతు సాయం చేశాడు.

వర్మ స్వీయ దర్శకత్వంలో నిర్మించిన ‘ఆఫీసర్‌’ చిత్రం విడుదలకు ముంబయి హైకోర్టు సే విధించింది. తదుపరి ఆదేశాలు వచ్చే వరకు విడుదల చేయవద్దంటూ వర్మను ఆదేశించింది. ఒక డిస్ట్రిబ్యూటర్‌ తమకు రావాల్సిన మొత్తంను వర్మ చెల్లించడం లేదంటూ కేసు వేయడంతో పై విధంగా కోర్టు తీర్పు ఇచ్చింది. ఆ మొత్తంను ప్రస్తుతం వర్మ తీర్చే పరిస్థితిలో లేడు. సినిమా విడుదలైతే కాని ఆ డబ్బు ఇవ్వలేని పరిస్థితి. ఇలాంటి సమయంలో నాగార్జున ముందుకు వచ్చి ఆ మొత్తంను చెల్లించాలని నిర్ణయించుకున్నాడు. అందుకోసం ఆ డిస్ట్రిబ్యూటర్‌తో మాట్లాడి, చెల్లించాల్సిన మొత్తం ఇచ్చేసి, ఆ తర్వాత కోర్టు నుండి క్లీయరెన్స్‌ను తెప్పించాడు.