Freedom 251 smartphone founder quits company

ఫ్రీడం స్మార్ట్ ఫోన్ గుర్తుందా? రింగింగ్ బెల్స్ అనే సంస్థ 251 రూపాయలకే స్మార్ట్ ఫోన్ అనేసరికి అంతా ఎగబడి బుకింగ్ చేసుకున్నారు. గుర్తు ఉండే ఉంటుంది కదా. ఎలా మర్చిపోతారు .. ఏకంగా ఏడు కోట్ల మంది ఈ మొబైల్ కోసం తమ పేరుని రిజిస్ట్రేషన్ చేసుకున్నారు. చాలామంది ముందే డబ్బును పే చేసేసారు కూడా. ఇప్పుడు ఆ కంపెనీకి ఓ పెద్ద ఎదురుదెబ్బ తగిలింది.

రింగింగ్ బెల్స్ సంస్థ వ్యవస్థాపకుడు, ఆ సంస్థ ఎండీ మోహిత్ గోయల్ కంపెనీ బాధ్యతలు నుంచి తప్పుకున్నాడు. తన సోదరుడు, సహ వ్యవస్థాపకుడు అన్మోల్ గోయల్ తో విభేదాల వలనే మొహిత్ ఈ కంపెనీ నుంచి వైదొలిగినట్లు తెలుస్తోంది. మోహిత్ తో పాటు, అతని భార్య, రింగింగ్ బెల్స్ సీఈవో ధారణ గోయల్ కూడా రాజీనామా చేసింది.

మరి మొబైల్ ని బుక్ చేసుకున్న వారి పరిస్థితి ఏంటి ? కంపెనీ మూతపడిపోనుందా? పెట్టిన డబ్బు తిరిగిరాదా? కంగారు పడకండి. అలాంటి ప్రమాదమేమి లేదని అన్మోల్ గోయల్ ప్రకటించారు. ఇప్పటికే 70,000 మొబైల్స్ డెలివరి చేసారట. సంస్థ కార్యకలాపాలు యథాతథంగా కొనసాగుతాయని, కాబట్టి ప్రజలు ఆందోళనకు గురికావాల్సిన అవసరం లేదని చెప్పుకొచ్చారు.