బాలయ్య.. ఈ తొందర ఎందుకయ్యా     2018-07-02   05:04:02  IST  Raghu V

నందమూరి బాలకృష్ణ కెరీర్‌ ఆరంభం నుండి కూడా సంవత్సరంకు రెండు మూడు సినిమాలకు తగ్గకుండా చేస్తూ వస్తున్నాడు. అయితే గత కొంత కాలంగా స్టార్‌ హీరోలు సినిమాల సంఖ్య గణనీయంగా తగ్గించారు. సంవత్సరంలో ఒకటి మాత్రమే చేస్తున్నారు. కొందరు హీరోలు మాత్రమే రెండు చేసేందుకు ప్రయత్నిస్తున్నారు. అయితే వారు కూడా రెండు సంవత్సరాలకు మూడు చిత్రాల కంటే ఎక్కువ విడుదల చేయలేక పోతున్నారు. ప్రస్తుతం ఒకానొక సమయంలో ఒకే చిత్రాన్ని చేస్తున్నారు. గతంలో మాదిరిగా ఒకేసారి మూడు నాలుగు చిత్రాలను దర్శకుడు కాని, హీరో కాని కమిట్‌ అవ్వడం లేదు. కాని బాలయ్య మాత్రం మునుపటి ఫార్ములానే ఫాలో అవుతున్నాడు.

బాలకృష్ణ ఒకవైపు చిత్రాన్ని చేస్తూనే మరో వైపు తన తదుపరి చిత్రం గురించి ఆలోచిస్తూ ఉంటాడు. సినిమాలు వేగంగా చేయాలని భావించే బాలకృష్ణ తన తొందరపాటు నిర్ణయంతో సినిమాలను ఫ్లాప్‌ చేసుకుంటున్నాడు. సినిమాల సంఖ్య పెంచుకోవాలని తప్ప, మంచి సినిమాలు చేయాలనే ఉద్దేశ్యం బాలయ్యకు లేదా ఏంటీ అంటూ కొందరు ఫ్యాన్స్‌ అంటున్నారు. బాలకృష్ణ గత కొంత కాలంగా అడపా దడపా తప్ప పెద్దగా సక్సెస్‌లు అందుకున్న దాఖలాలు లేవు. అయినా కూడా ఆయన ఏమాత్రం ఆలోచించకుండా సినిమాలు కమిట్‌ అవుతూ వస్తున్నాడు.