బచ్చా గాడే అవార్డు కొట్టేశాడు!     2018-06-17   03:17:10  IST  Raghu V

భారత దేశంలో సినిమా పరిశ్రమకు కేంద్ర ప్రభుత్వం జాతీయ అవార్డులను ప్రధానం చేస్తూ ఉంటుంది. దేశ వ్యాప్తంగా అన్ని సినిమా పరిశ్రమల వారు కూడా జాతీయ అవార్డు కోసం పోటీ పడుతూ ఉంటారు. జాతీయ అవార్డు తర్వాత అత్యంత క్రేజ్‌ ఉన్న అవార్డులు ఫిల్మ్‌ ఫేర్‌ అవార్డులు. చాలా సంవత్సరాలుగా అవార్డులు ఇస్తూ వస్తున్న ఫిల్మ్‌ ఫేర్‌ తాజాగా 2017 సంవత్సరానికి గాను అవార్డులను ఇవ్వడం జరిగింది. భారీ ఎత్తున జరిగిన ఈ కార్యక్రమంలో సినీ తారలు మెరిశారు. అందరి అంచనాలకు తగ్గట్లుగానే తెలుగు చలన చిత్ర చరిత్రను తిరగ రాసిన బాహుబలికి ఎక్కువగా అవార్డులు వచ్చాయి. ఇక ఎక్కువ మంది దృష్టిని ఆకర్షించిన బెస్ట్‌ హీరో అవార్డు మాత్రం విజయ్‌ దేవరకొండకు దక్కింది.

హైదరాబాద్‌లో జరిగిన 65వ సౌత్‌ ఫిల్మ్‌ ఫేర్‌ అవార్డుల వేడుకలో తెలుగు, తమిళ, కన్నడ, మలయాళ సినీ పరిశ్రమల వారు భారీ ఎత్తున తరలి వచ్చారు. ఈ వేడుకల్లో సౌత్‌కు చెందిన నాలుగు సినిమా పరిశ్రమలకు చెందిన అవార్డులను ప్రకటించారు. తెలుగు సినిమా విభాగం విషయానికి వస్తే ఉత్తమ చిత్రంగా అంతా ఊహించినట్లుగానే బాహుబలి 2 నిలిచింది. ఉత్తమ హీరోగా విజయ్‌ దేవరకొండ, ఉత్తమ హీరోయిన్‌గా సాయి పల్లవిలు అవార్డు దక్కించుకున్నారు. ఉత్తమ హీరోగా హేమా హేమీలు నామినేట్‌ అవ్వగా అర్జున్‌ రెడ్డి సినిమాకు గాను విజయ్‌ దేవరకొండకు దక్కడం అందరికి ఆశ్చర్యంను కలిగించింది.