ఇంత జరిగాక బంగార్రాజు వస్తాడా?     2018-05-27   01:56:24  IST  Raghu V

‘సోగ్గాడే చిన్ని నాయన’ వచ్చి మూడు సంవత్సరాలు అవుతుంది. ఆ సినిమాలో నాగార్జున పోషించిన బంగార్రాజు పాత్రను మాత్రం ప్రేక్షకులు అంత సులభంగా మర్చిపోవడం లేదు. ఆ సినిమా సక్సెస్‌లో బంగార్రాజు పాత్ర కీలకం అని చెప్పడంలో ఎలాంటి సందేహం లేదు. బంగార్రాజుగా నాగార్జున ఆకట్టుకున్నాడు. దర్శకుడు కళ్యాణ్‌ కృష్ణ బంగార్రాజు పాత్రను అద్బుతంగా తెరకెక్కించాడు అంటూ విమర్శకుల నుండి ప్రశంసలు దక్కాయి. అందుకే బంగార్రాజు పాత్ర చుట్టు ఒక కథను అల్లు మరో సినిమాను తీయాలని నాగార్జున కోరుకున్నాడు.

కళ్యాణ్‌ కృష్ణ ‘బంగార్రాజు’ చిత్రం కోసం చాలా కథలు సిద్దం చేశాడు. రారండోయ్‌ వేడుక చూద్దాం చిత్రం తర్వాత బంగార్రాజు వెండి తెరపైకి రాబోతుందని అంతా భావించారు. కాని అనూహ్యంగా బంగార్రాజు ఆలస్యం అవుతూ వస్తుంది. నాగార్జున ఇతరత్ర ప్రాజెక్ట్‌లతో బిజీగా ఉండటం వల్ల రవితేజతో దర్శకుడు కళ్యాణ్‌ కృష్ణ ‘నేలటిక్కెట్టు’ చిత్రాన్ని తెరకెక్కించాడు. ఇటీవలే ప్రేక్షకుల ముందుకు వచ్చిన నేలటికెట్టు దారుణమైన పరాజయం పాలైంది. కనీసం వారం రోజులు కూడా ఆ సినిమా థియేటర్లలో ఉండే పరిస్థితి లేదు. దర్శకుడు కళ్యాణ్‌ కృష్ణపై ప్రేక్షకులు పెట్టుకున్న నమ్మకం వమ్ము చేశాడు.